Óscar Latas Alegre (Samianigo – Aragón-, 1968) Diplomato en Machisterio e lizenziato en Cheografía e Istoria por a Unibersidá de Zaragoza, ye, en l’autualidá, teunico de Cultura d’a Comarca Alto Galligo e miembro d’o Consello d’a Fabla Aragonesa.
Como escritor, ye autor de bels poemarios premiatos, como Berari (Premio literario Billa de Sietemo, 2003), Sísolas (Aczésit Premio Lo Grau, 2004), Ortensia de Chudas (Menzión d’o Premio Arnal Cavero, 2004), Postaletas (Premio literario Billa de Sietemo, 2009) e Ya s’ha dispertato Guara (Aczésit Premio Ana Abarca de Bolea, 2009) e d’a nobela curta Pétalos de febrero en Bordeus (2007). Obtenió o “Premio Arnal Cavero 2011” d’o Gobierno de Aragón por a suya obra Chuegos florals. Repuis d’asperanza y malinconía (2012).
Dixaré de fanguiar por o bardo d’os tuyos deseyos
d’entruchar-me en os pensamientos quexosos
pa ixaguar-me a boca con os tuyos besos
dica que me faigan tocaduras en os morros.
Ruxiaré d’augua fresca os zagueros recuerdos
maitín, desplegaré o telón d’o mío barco
e esnabesaré lueñes d’as auguas xucatas
d’amors fuscos,
anque a garbinada me faiga a cuentra e
m’escruchine l’alma.
Maitín engaronaré a mía seteguera
de primabera e flors, charpuquiaré como
d’antes,
cagüerno d’as brasas, pa que puyen
as chislas nuebas d’a mía bida
/
Besos d’otel emberenatos
Cambras cochanbrosas
almorzando flors machurritas
(murriosas e con punchas)
Beyendo dende a prazolera, dende o leito,
L’ambiesta marinera d’a nuei
Como si estase a primera begata
Chompito en o pecado d’o champán franzés
Dormindo chunto de tú, en un tellato,
Beyendo o mapil d’a bela esmerar-se
Zera que caye con amargor
Como un café barrechato con sal.
E que aguardará d’eterno por catar.