Inaciu Galán (Xixón, 1986) Doctor pola Universidá d’Uviéu cola tesis «La llingua asturiana nel Franquismu», ye escritor, periodista, profesor y xestor cultural. Pol so llabor a favor del asturianu foi reconocíu col Premiu Urogallo, al que se suma a una llarga riesta de premios lliterarios, ente los que destaquen el Premiu Fernán-Coronas de poesía o l’Enriqueta González Rubín de periodismu. Autor del primer diccionariu billingüe asturianu-inglés/inglés-asturianu, asoleyó tamién un llibru pa la reciella «Nel, el coríu que nun sabía nalar» y trés poemarios «Tierra podre» (2016), «Patria en pallabres menores» (2018) y «Nes ruines de la nueche y les hores» (2018). Nel campu de la narrativa en 2019 asoleya «Cartes nel horru (y delles hestories más)». El so llabor nel ámbitu lliterariu llevólu a fundar y dirixir a lo llargo de más d’una década la revista Formientu, dedicada a autores mozos. Como activista polos drechos llingüísticos foi fundador y presidente d’Iniciativa pol Asturianu dende 2011 a 2019 y ta involucráu en numberoses iniciatives en favor del asturianu.
La vida nes ruines de la ciudá
Recuerdes requexos de la ciudá,
espacios onde ficisti vida:
Un cine que yá nun esiste,
onde agora faes la compra
sobre les ruines de dellos
fragmentos de vida (y de películes)
que siguen más o menos claros
dientro de ti.
Una hamburguesería y una urbanización
llevantaes sobre los pasos de baille
del cantar del branu de 2002, sobre
los primeros besos de tantos amigos,
sobre les primeres borracheres.
¿Cómo vivir nuna ciudá
construyida sobre
les ruines de la to
alcordanza?
Seique recordando menos,
seique sumando
espacios nuevos,
a sabiendes
del inevitable destín
de tolos espacios que son de to,
pero namás como empréstamu.
Del poemariu Nes ruines de la nueche y les hores (Premiu Fernán Coronas 2016)
Mete mieu
Cuando camines les cais
y pienses qu’ellí cuasi
garra una bomba a
la güela. Cuando sientes
lo cerca que ta, que
pequí circulen tovía dellos
que lo vivieron. Mete mieu.
Cuando recuerdes qu’equí,
a dos pasos d’onde
mos sentamos a tomar
daqué nuna terraza,
con tola tranquilidá
d’estos díes soleyeros,
paró güelu a descansar
cuando llegaba d’una nueche
de caminada, pa ver
si vivía’l so padre
o taba nuna cuneta.
Cuando te decates de que
la hestoria
nun ta nel libru,
ta ellí mesmo,
y nun ye gloriosa, ye
mísere, ye lloru. Mete mieu.
Cuando escarbes no que
llamamos Hestoria, y pa
otros ye a seques, “vida”,
ye un padre muertu,
una hermana desapaecida,
ye una medrana infinita
nel cuerpu. Mete mieu.
Inaciu Galán (Xixón, 1986)
Del poemariu Nes ruines de la nueche y les hores (Premiu Fernán Coronas 2016)